خطوات ما بعد الويندوز

أنا هاشرح هنا إيه البرامج المهمه اللى يستحسن إننا ننزلها على الجهاز بعد ما يكون عندنا ويندوز جديد, دا لأن بعد ما بنحط ويندوز جديد بيبقى فى أحيانا مشاكل فى التعرفيات بتاعة الكروت الخاصه بالكمبيوتر , او بيكون فى برامج معينه ما بتشتغلش ملفات على الجهاز إلا بيها و ما تشتغلش من غيرها ,فى مواقع كتير حاطه برده دليل أو أكتر للبرامج المهمه بس برده فى برامج ملهاش لزمه أوى وأنا من رأيى أن أى حد مهم أن يكون عنده مكتبه برامج بتاعته المهمه اللى فيها البرامج اللى بيشتغل عليها ودى تقدر تحفظها على DVD علشان تضمن انها فى مكان مضمون أو ترفعها على النت فى موقع كويس تقدر تنزل منه اللى أنت عايزه, و قريب إن شاء الله هاحط قايمه بأهم الموقع اللى تستاهل فعلا انك تتعامل معاها فى موضوع التخزين على النت .
أنا هارتبهم حسب الأهميه الأهم فالمهم , فى برامج بتبقى ببلاش و مش محتاجه ترخيص علشان نجيبها من النت و فى برامج بتبقى ليها رخصه او تشتريها بفلوس . أنا البرامج اللى هالاقيلها مكن تقدر تنزلها منه هاحط لها لينك على الاسم. ولما تدخل على موقعهم هاتدوس على Download هاينزل البرنامج.

طيب أنا دلوقتى عندى ويندوز جديد زى ما قدامنا كده فى الصوره .



مش باين عندى ولا My computer ولا My Dоcuments ولا أى حاجه, أعمل ايه ؟

الفيديو هنا بيبين إذاى أجيبهم وإذاى أظبط ال Desktop بتاعى....




دلوقتى الDesktop بعد ما ظبطته و بقى تمام هادخل على البرامج المهمه اللى لازم تكون عندى على الجهاز وهى كالتالى :

1- التعريفات.
ودى غالبا معظم الناس بتبقى عندها على CDs جايه مع كل كرت أو واحده فيها التعريفات بتاعه الجهاز كله من أوله لأخره, طب انا لو معنديش أعمل ايه ؟
تقدر بكل بساطه تدور على التعريف على النت, لأنك ما دام أشتريت الكارت أو أى جزء للكمبيوتر الشركه الخاصه اللى صنعته هاتلاقيها حاطه على موقعها الرسمى كل التعريفات .

ليه التعريفات أول حاجه ؟
لأنها أهم حاجه, لأنك مش هاتقدر تشغل ملفات صوت مثلا من غير تعريف الصوت , مش هاتقدر تشغل فيلم أو فيديو من غير تعريف كارت الشاشه حتى لو إشغل مش هايبقى بأعلى إمكانيه الكارت .

2- برامج الحمايه.
سواء انت بتفضل برنامج معين أو عندك برنامج مرشحلك من حد لازم تنزله على الجهاز قبل ما تبدأ تدخل على الويندوز لأن ممكن من حظك تدخل على موقع مشموم ويبقى عليه فيروس محترم ياكلك الجاهز حته حته وهاتضطر تنزل ويندوز من الاول و جديد, يبقى الأفضل من الاول أنك تنزل أنتى فيروس قبل ما تبدأ تتعامل على النت, والفيروس يا جماعه مش زى ما فى ناس متخيله يعنى مش معنى إنك متصل على النت ممكن يجيلك فيروس, هو مش بيطير فى الجو ولا بيمشى فى السلك زى الكهرباء , الفيروس لازم تكون دخلت على موقع وكان عليه فيروس و حملته منه سواء نزلت ملف او الموقع عامله autoplay يعنى يفتح اول ما تفتح الصفحه , ولما بينزل فيروس بيضرب الملفات اللى نهايتها .exe يعنى مش هاينزل على أغنيه لأ دا كل ما بتفتح برنامج بيحمل نفسه عليه و يبدأ يشتغل كل ما بتشغل البرنامج . مش هاطول عليكم فى شرح الفيروس و كيفيه عمله المهم انكم تكونو كونتم فكره عن الفكره العامه للفيروس علشان ما تهولوش المسأله ولا تستهونوا بيها, و تحاولوا تعملوا- update- تحديث للبرنامج لأن فى كل شويه فيروسات بتنزل جديد يعنى ما حدش يشغل انتى فيروس سنه 2000 مثلا . بقدر المستطاع يكون جديد و معموله تحديث.
ودا لينك الفيديو بتاع شرح إذاى ققدر أعمل scan على جهازى من غير ما يكون عندى أى أنتى فيرس .

الدرس الخاص بالأنتى فيرس من النت

3-تنزيل البرامج

البرامج الخاصه بيا على الجهاز ودى بتكون الخطوه التاليه بعد الانتى فيروس, والبرامج الاساسيه اللى أعتقد إن أى جهاز لازم تكون فيه البرامج دى :

أ-Microsoft Office Tools:

واللى بيندرج تحتيه البرامج المعروفه زى الوورد و الاكسس و الاكسيل و البوربوينت و ما الى ذلك و تكمن أهميه البرامج دى فى أنها إمكانيتها كتير و مع ذلك سهله فى الاستعمال و لأى مستخدم مش لمستخدمين محترفين للكمبيوتر, سواء عايز تكتب ورقه او تعمل مقدمه لمشروع او لأى منتج أو اى حاجه فاهتستعمل واحد منهم أكيد و دا غير الميزينيه اللى ممكن تتعمل على برنامج الاكسيل ومش هاتطرق للشرح أكتر لأن دا هايبقى درس لوحده إن شاء الله المهم إن برامج Microsoft Office مهمه و ما فيش جهاز المفروض يبقى من غيرها لأنك يوما ما هاتحتاجها أكيد.

ب-Codec Pack

ودى تقدر تلاقيها على أى موقع أو منتدى ودى خاصه ب windows media player الخاص بتشغيل ملفات الفيديو و الأفلام ووضع الترجمه وتقد تعمل بحث على جوجل او على اى موقع بحث على كلمه Codecs و هاتلاقى كتير بس يستحسن أنك تقرا عنها الاول و ما تنزلش كتير, يعنى تسوف منتدى مثلا و فيه كودك كويسه و تنزله و تشغله و تشوف الافلام شغاله ولا لأ .

ج-برامج الميديا :


-Winamp : يمكن أنت بتسمع ملفات الmp3 و أى ملفات صوت على برنامج تانى, بس لما تجرب ال winamp هاتعرف يعنى ايه نقاء صوت و سرعه فى التشغيل على عكس برامج كتير, يعنى انا بفضل البرامج السريعه و الكويسه للجهاز عن البرامج اللى ممكن يكون تصميمها كبير و الجرافيك اللى فيها عالى لأنها بتغل مساحه أكبر من ذاكره الجهاز و اللى بدوره بيبطأ الجهاز,و فى الاخر كله بيشغل الملف برنامج الWinamp من أحسن البرامج إن لم يكن أفضلها ومتخصص فى تشغيل ملفات الصوت بمعظم إمتدادتها .
-realplayer: بيشغل ملفات الموبيل لما تنزلها على جهازك .


د-برامج الشات : Yahoo messenger, msn live, skype

*الدرس الخاص ب Skype.

*الدرس الخاص ب Yahoo messenger 1.

*الدرس الخاص ب Yahoo messenger 2.

والبرامج دى برده هاتلاقوا شرحها بالتفصيل على المدونه تقدرو تشوفوها فى الارشيف الى فى القائمه جهة اليمين .

هـ-Adobe Reader: ودا خاص بتشغيل ملفات ال PDF ودى بتبقى كتب إلكترونيه او شرح معين و مهم أنه يكون على جهازك.
البرامج الخاصه بيك إنت اللى بتشتغل عليها

و- Java Script : و دى بتحتاج تشغلها لما تفتح شات الياهوو او تلعب لعبه اون لين .

ز- Winrar: ودا خاص بالملفات المضغوطه و حلو جدا فى ضغط مساحه الملفات و ممكن كمان تحط باسوورد على الملف المضغوط.



وفى النهايه أتمنى انكم تكونوا أستفدتم ولو فى حد شايف إنى نسيت برنامج ممكن يحطه فى تعليق على الموضوع و شكرا .

تعليقات

‏قال عبيدالرحمن
السلام عليكم ورحمة الله وبركاته
انت ممكن تكون حاطط الشرح ده من زمان بس انا دخلت النهارده وقرأته , انا حبيت اكتب التعليق ده علشان اعرفك ان اللي انت بتعمله ده يعتبر صدقة جارية , ربنا يكرمك .
أخوك عبيدالرحمن
‏قال Yasser Abo El Ella
شكراً أخى عبيد
وانا مش حاطه من زمان أوى يعنى, و يارب تكون استفدت و فى على فكره دروس جديده تقدر تشوفها من التصنيفات اللى موجوده فى المدونه
شاكر ليك تعليقك.

المشاركات الشائعة