ICDL تقنيه المعلومات 1

أول مادة ها تبقى فى الأى سى دى أل ICDL :



أ‌- تقنيه المعلومات.واللى فيها لازم نعرف التالى :

1-ما هو الكمبيوتر ؟ ( ودا درس النهارده )

2- الشبكات .

3-ما هى أجهزه الإدخال (Input )؟

4- ما هى أجهزه الإخراج (Output ) ؟

5- مقدمه فى الانترنت.



دى أول ماده و هى غلسه شويه لأنها نظرى شويه بس اهو بقى هانعمل ايه ؟ لازم تعرفوا المواد كلها, والماده دى بتعرفك من البدايه ايه معنى الكمبيوتر أساسا ؟, و ايه الشبكات و تعتبر طبعا حاجات اساسيه جدا جدا بس لرده ممكن تلاقى حاجه مكنتش تعرفها و علشان ما تتخنقش خدها كأنها معلومات عامه مش اكتر و بحيث تقدر تجاوب بعد كده الامتحان بتاعها و انت مطمن .

ما هو الكمبيوتر ؟

شاشه و جهاز ؟ أكيد لأ

بيقولك يا سيدى ان الكمبيوتر دا عباره عن أله ألكترونيه وبها وحده معالجه بيانات , للحصول على معلومات مفيده وقابله للتخزين و إجراء جميع العمليات الحسابيه و المنطقيه بدقه و سرعه عاليه تتم وفقا للبرامج الموجوده عليه.

طبعا دا مش تعريف اللى هو انت تحفظه ظهرا عن قلب , لأ دا تعريف تفهمه بحيث انك تقدر تعبر عن الكمبيوتر لما يسألك من وجهه نظرك من خلال فهمك للأجابه دى, و على فكره ما اعتقدش انه ممكن يجيبلك اساسا سؤال عرفلى الكمبيوتر علشان كده افهموه ما تحفظهوش .

طب و ايه هى مجالات الكمبيوتر ؟
طب بالذمه دا سؤال ؟ يعنى دا انت لو قلتله الحاجات اللى انت شايفها قدامك بس هاترصله بتاع 10 سطور .
انت بتتعلم دلوقتى على ايه ؟ ( مجالات التعليم ) .
وانت دلوقتى جبت دروسى دى منين ؟ ( مجالات الاتصال ).
انت لما دفعت تمن اشتراك النت دا حصلوه و عملو بيه ايه ؟ ( مجالات التجاره )
لما هاتذهق من الدرس و ال أى سى دى أل ICDL كلها هاتقوم قافل الموقع دا و هاتلعب او تشوف فيلم مثلا ؟ ( مجالات الترفيه ).

والاداره , الحكومه,التسويق , الطباعه , الاعلانات , الصحه,الصناعه,الزراعهالصحافه,...... إلخ إلخ


وبالتالى لا توجد اى مؤسسه أو شركه أو مكتب من أجهزه الكبميوتر . و اصبحت المنازل كلها تقريبا تمتلك اجهزه كمبيوتر.
ما هى أنواع الكمبيوتر ؟

1- الكمبيوتر الشخصى . (Personal computer)
دا الجهاز العادى اللى عند اى حد
2- كمبيوتر الشبكات .(Work station)
ودا لما يكون اكتر من جهاز متوصلين مع بعضهم فى شبكه حتى لو مش شبكه الانترنت ومن خلال هذه الشبكه يمكنهم تبادل الملفات والمعلومات الموجوده بالشبكه .
3-الكمبيوتر المركزى ( العملاق ) ( Main frame computer):
ودى اللى بيستخدموها فى الشركات الكبيره للتأمين مثلا او البورصه اللى بتتطلب إمكانيات أعلى من إمكانيات الجهاز العادى وتقنيات أكبر, لأنه عالى التكلفه ويعتمد على نظام قوى ويتحمل أكبر عدد ممكن من المستخدمين الذين يستخدمون وحدات طرفيه تتصل بالجاهز المركزى
4-الكمبيوتر المتوسط:
ودا شبه المركزى بس ققل فى الامكانيات شويه و طبعا فى السعر .
5- الكمبيوتر المحمول ( Laptop ): ويمتاز بسهوله حمله لأى مكان والعمل عليه من دون مصدر طاقه لمده معينه ولذلك فهو اغلى من الكمبيوتر الشخصى .



6-الكمبيوتر الممتاز أو السوبر (Super computer): ومن أسمه كده ممكن تتخيلوا عامل إذاى, هو أكيد مش بيطير بس سرعه مهوله و قدرته فى معالجه البيانات عاليه جدا و دقه وبتستخدمه هيئات الدفاع مش معقول هاتبقى بلد فى حاله حرب و يفتح الكمبيوتر يلاقى الويندوز وقع او الجهاز وقف مثلا , و بيستخدموه فى التبؤ بالطقس المعقد لكثره إدخال البيانات و التى يتمكن من تفكيكها و تحليلها و حلها و ترتيب نتائج لها فى سرعه كبيره والصوره دى بتوضح الحجم بتاع الكمبيوتر عامل اذاى ( عايزله غرفه لوحده )






والكمبيوتر يمكن تقسيمه الى جزئين:

А-جزء الهارد ووير Hardware)).
و المقصود به أى شيء بالجهاز يمكن لمسه باليد سواء إلكترونيه أو كهربيه .
يعنى اى حاجه تلمسها دى اسمها هاردوير
شاشه, لوحه مفاتيح, ماوس , سماعات, روتر, بروسيسور,مروحه البروسيسور,الباور سابلاى, الماذر بورد, أى كرت من الكروت الموجوده على الماذر بورد. كله كله

الأجزاء الرئيسيه للكمبيوتر (هاردوير) : هاناخدها بالترتيب اللى قدامك دلوقتى على الجهاز علشان ماتنساش حاجه منهم و تعرف وظيفه كل جزء.
1-الشاشه.
وهى كأى شاشه تلفزيون والتى تعرض البرامج, و منها مقاسات متعدده مثلا : 14 بوصه 16 18 21 بوصه و الشاشات الحديثه يوجد بها فلتر للأشعه ولكن بالطبع لا يحجب كل الاشعاعات و هى مضره للعين و بالتحديد لسائل العين الذى تجففه علشان كده عينك بتحر لما بتقعد قدام الجهاز كتير .

2-الكيسه (The System Unit) اللى هى بالعربى وحده النظام.
هى الصندوق الصاج اللى على الشمال جنب الشاشه دا و فى أجهزه محترمه بتبقى الوحده دى تحت الشاشه زى اجهزه ال , DEL,IBM, APPLE, GATEWAY و غيرها من الشركات المحترمه لكن صنع فى الصين او التايوانى الحلو زى اللى انا شغال عليه دا هاتلاقيها جنب الجهاز و دا مش بيفرق فى المكونات فى اى حاجه يعنى نفس تركيب دى هى نفس تركيب دى بس الفرق ان اللى واقفه الماذر بورد بتبقى واقفه و التانيه بتبقى نايمه
بس, و وحده النظام دى تعتبر هى جهازك لأن جواها مثلا: الماذر بوررد( اللوحه الام ) واللى بيبقى فيها او راكب عليها بمعنى ادق كل الكروت بتاعه الجهاز و بتوصل الكروت بالهارد ديسك و بيركب عليها البروسيسور و مفيش كرت ملوش صله بيها كله متركب عليها او واخد وصله منها زى الهارد ديسك او الCD Room و ال DVD .

2- الماذر بورد .
لوحه داخل وحده النظام و تتصل بجميع مكونات الكمبيوتر بشكل مباشر أو من خلال كابل وتضمن وحده المعالجه الرئيسيه ( البروسيسور ).








لو فتحت جهازك و دا أنا اعتقد إن أى حد عملها طبعا و فتح جهازه حتى لو من باب الفضول ولو مفتحتوش افتحه لباب العلم بالشيىء
هاتلاقى زى الصوره دى كده









فى قدام وشك علطول لوحه كده حلوه سواء بقى لونها احمر اخضر اصفر مش فارقه بس مفيش لوحه غيرها هى دى






(ROM-BIOS) : ذاكرة للقراءة فقط مخصصة للإدخال وللإخراج الأساسي وهي شريحة بتتركب في نظام الكمبيوتر على الماذربورد . وهي تحتوي على البرامج اللازمة لجعل الكمبيوتر يعمل مع نظام التشغيل،

3-وحده المعالجه الرئيسيه (The Central Processing Unit):
من أهم مكونات الكمبيوتر ودا اهميته انه بياخد أوامرك عن طريق نظام التشغيل او البرامج و بيترجمها للغه الكمبيوتر و بيحولها لأوامر و بيطلعها مخرجات فى وقت قليل جدا و بتعتمد على قوته و سرعته اللى بتتقاس بالميجا هرتز (MHz) و كل ما بقى سرعته اعلى دا معناه انه اسرع طبعا.



4- الرامات ( ( Ram
هاتلاقى جنب وحده المعالجه الرئيسيه دى شريط طويل شويه كده لونه اخضر و ملزوق عليه مقاومات سودا دى بقى يا برنس أسمها ( ذاكره الوصول العشوائيه ) (Random Access Memory )
(RAM ) الرامات يعنى بمعنى اسهل هى الذاكره اللى بتاخد كل التطبيقات اللى انت بتقوم بيها على جهازك زى الويندوز وهو بيحمل او أى برنامج شغال عليه لحد ما تحفظه على الجهاز و اللى بيتحفظ على القرص الصلب ( الهارد ديسك ) و كل ما زادت الرامات كل ما كان أفضل لأنها بدورها هاتسرع جهازك, علشان كده لو عندك رامات قليله هاتلاقى جهازك بطىء و بيقف كتير من الاخر هايخنقك و بتقاس بالميجا بايت (Мb) .

5-مزود الطاقه (Power Supply) الباوور صابلاى. ودا هاتلاقيه صندوق صغير على الشمال فوق لما تبص على وحده النظام وهاتلاقى طالع منه أسلاك كتير أوى (احمر و اسود واصفر ) دا مهمته أنه بياخد الكهرباء و يحولها من 220 فولت او 110 حسب الدوله علشان يطلعها بفولتات قليله حسب استعمال الوحده المعالجه ليها.

6- القرص الصلب (Hard Disk ) الهارد ديسك اظن كلنا عارفينه وهى المساحه الاساسيه بجهازك و تستخدم فى تخزين البرامج و نظام التشغيل نظرا لسرعتها فى التعامل مع الملفات المحفوظه بها .







7- مشغلات الاقراص المدمجه (Digital Versatile Disk ) DVD



وهى تسمح لك بتشغيل الاقراص المدمجه على جهازك وسعة تخزين هذه الاقراص 4.7 جيجا و منه ما يصل الى 8 جيجا .



8- مشغلات الاقراص المدمجه ( CD – Room )
وهى مثل الاقراص المدمجه السابقه و لكن مساحتها أصغر منها و تصل إلى 750 ميجا او 800 ميجا .

طيب دا كان ( واحده النظام )
ايه تانى ناقص قدامك فى الكمبيوتر لسه ما قولناهوش ؟

9- الماوس.(mouse)

10- لوحه المفاتيح. (Keyboard)

11- السماعات .(Sounds)

12- الطباعات.(Printer)

13- الماسح الضوئى.(Scanner)
14-Universal Serial Bus (USB)

15-قارىء الاقراص الممغنطه الديسكات Floppy disk

خلصنا كده اللى نقدر نشوفه قدامنا من الجهاز

لو بصينا ورا فى وحده النظام هانلاقى التالى :
16- المنفذ المسلسل Serial Port : ودا الفتحه اللى بتوصل بيها الجهاز بخط التليفون او الفاكس و اللى بتبقى على الجاهز بأسم Com1, Com2

17- المنفذ المتوازي Parallel Port : فتحه بس و كبيره و باينه ودى بتبقى للطابعه أو الاسكانر و بتبقى على الجاهز بأسم : LPT1,LPT2

18-الناقل المسلسل الشامل Universal Serial Bus (USB: ودى الفتحه المخصوصه بتاعه أى حاجه بتشتغل بال USB زى الكاميرا و احيانا ماوس او سكانر ممكن و طابعه ممكن
B- جزء السوفت وير (Software).
و بالكمبيوتر نظامان لتتمكن من القيام بالمهام المطلوبه منها :

1- نظام التشغيل .
2- برامج التطبيقات .


نظام التشغيل ؟ اللى هو ايه ؟ هى البرامج التى يجب ان تتوافر على الجهاز قبل القيام بأى عمليه مطلوبه منها .
اللى هو بالبلدى كده ( الويندوز ), ينفع تشتغل على جهاز من غير ويندوز او نظام ال dos ?
أكيد ما ينفعش يبقى نظام التشغيل زى الوسيله اللى بتخليك تتكلم بيها مع الجهاز .
طب ايه هو وظائف نظام التشغيل ؟

دا سؤال مهم,
1- حلقه وصل بين المستخدم و الكمبيوتر
- زى ما قلنا كأنك بتكلم الكمبيوتر يبقى دا الحلقه اللى هاتتصل عليه منها
2- هو البيئه التى يعمل من خلالها الجهاز وبيوفق التعامل معاه و مع البرامج الموجوده عليه.
- يعنى كأنك جبت سمكه ؟ بيئتها الماء إذن نظام التشغل هو البيئه اللى من غيرها ما يشتغلش الكمبيوتر .
3- بيفسر المدخلات التى تكون عن طريق الماوس او لوحه المفاتيح و يترجمها لأوامر إدخال و يقابلها بأوامر إخراج.
- يعنى انت لما بتدوس على زرار Enter ايه اللى يخلى الجهاز يفهم انك عايز تدخل على الملف دا ؟
دى مهمه نظام التشغيل وهى استقبال الامر كمدخلات و اخراجها كمخرجات .


برامج التطبيقات .

انت قدامك فى الجهاز كام برنامج ؟ من الاسم كده ؟
الويندوز و دا قلنا عليه نظام التشغيل , ايه تانى ؟ برامج الاوفيس مثلا و الادوب فوتوشوب و البرامج المهمه التانيه ... هى دى برامج التظبيقات اللى يقصدها او بمعنى ادق :

هى البرامج التى يستخدم الكمبيوتر من اجلها , حيث تؤدى بدورها الكثير من المهام التى يستفيد منها الافراد فى أعمالهم اليوميه مثل الطباعه و التحرير ورقابه المصانع و الجوده وغيرها من المهام الكبيره التى تؤديها البرامج بسهوله و دقه و سرعه عاليه.

كيفيه تطوير البرامج :
انا عايز اعمل برنامج مثلا بعمل ايه ؟
1- تقيم الاحتياجات من البرنامج المراد استخدامه.
2- تصميم و برمجه البرنامج للعمل به .


أظن مفيش اسهل من كده

يبقى احنا كده عرفنا
1- ما هو الكمبيوتر ؟
2- طب و ايه هى مجالات الكمبيوتر ؟
3- ما هى أنواع الكمبيوتر ؟
4-إيه هى مكونات الكمبيوتر ؟ ( مهم جدا )
5 - ما الفرق بين نظام التشغيل و برامج التطبيقات؟

أنا هاقف هنا علشان دا الدرس الاول بس علشان الناس تبدأ تستوعب براحتها ومحدش يتحجج إنى جريت, اهو حاجات بسيطه و خدوها كأنها معلومات عامه بس ركزوا لأنكم لما تمتحنم فى أى مركز ها تتسالوا فى الحاجات دى و طبعا المهم تفهمها و تعبر عنها صح مش انك تحفظ تعريف مكتوب فى كتاب او اللى انا كاتبه هنا. المره الجايه إن شاء الله ها حاول اجرى شويه برده لأنى مستتقل الماده دى و كنت عايز اخليها للأخر بس قلت مش مهم نبتدى بيها عقبال ما فى ناس تخلص امتحانات برده يبقى ما فاتهاش كتير
أشوفكم على خير فى الدرس اللى جاى و أى استفسار ايميلى اهو all_ofall@yahoo.com
أو تقدروا تكتبوا الاستفسار فى التعليقات على الموضوع.
وشكرا
[ اقرأ المزيد ...]

ICDL تقنيه المعلومات 2

أ‌- تقنيه المعلومات: (الجزء الثانى والاخير).

1-ما هو الكمبيوتر ؟ ( ودا الدرس السابق)

2- ما هى أجهزه الإدخال (Input )؟
3- ما هى أجهزه الإخراج (Output ) ؟
4- الشبكات .
5- مقدمه فى الانترنت.

.. دول هايكونوا درس المره دى ..

2- ما هى أجهزه الإدخال (Input) ؟



أجهزه الأدخال (input) : هى الاجهزه التى تستخدم فى إدخال البيانات للجهاز و هو ببساطه ما تم ذكره فى الدرس السابق و لكن هنا سنذكر الاسم و يمكنك معرفه الوظيفه من الدرس السابق .


بص كده على الجهاز اللى قدامك و قولى انت بتدخل المعلومات و البيانات للكمبيوتر عن طريق ايه ؟

1- لوحه المفاتيح Keyboard .




2-الماوس Mouse .



3- الماسح الضوئى Scanner .
4- ميكروفون Microphone .



5- لوحه اللمس - الخاصه باللأب توب - Touch pad .



6- عصا الالعاب Joy Stick.



7-المرقم Digitizer .




8- شاشه الرسم Wacom .




9-شاشه اللمس Touch Screen.



10- كاميرا Dgital Camera.



11-كاميرات الويب Web Camera .
الخ الخ الخ

دى ببساطه وحدات الادخال و دى وظيفتها انها بتدخل المعلومات و البيانات للجهاز .

أما عن واحدات الاخراج تقدر تقول عليها انها الواحدات اللى بتخرج البيانات و المعلومات المطلوبه من الجهاز :

1- الشاشه Monitor .


2-شاشه العرض الكبيره المسطحه Flat Screen Monitor .
3-السماعات Speakers .



4- الطباعات بأنواعها Printers واللى نقدر نقولهم :
Laser printers طابعات الليزر - Inkjet printers طابعات الحبر - Dot Matrix printers طابعات المصفوفه النقطيه .



شبكات المعلومات Information Network
-ايه هى الشبكه ؟
الشبكه بتاعه الصيد بتبقى عباره عن خيوط كلها متصله ببعضها .بالظبط زى شبكه الكمبيوتر بمعنى أن الشبكه هى ربط أو توصيل أكتر من كمبيوتر ببعض .

يعنى الشبكه تكون بين جهازين او اكثر تتصل ببعضها البعض بأسلاك أو خطوط الهاتف أو ألياف ضوئيه لتبادل الموارد .


الفوائد العائده منها :
1-مشاركه الموارد. 2-الاتصال بالأجهزه الاخرى. 3-مشاركه المعلومات.

وفى منها نوعين :
1- الشبكه المحليه : (LAN) ( Local Area Network)



ودى المقصود بيها ربط بعض الاجهزه التى تكون بمكان واحد لتسهيل عمليات نقل المعلومات , كالشركات والمكاتب فالأفضل أن تتصل كمبيوترات الشركه ببعضها بكل قسم لتسهيل عمليه نقل البيانات أو طباعتها من طباعه واحده و أستخدام CD ROOM واحد و ماسح ضوئى (Scanner) واحد يعنى انت فى الشغل لو عندك أكتر من جهاز فى المكتب اللى انت فيه, و حبيت تنقل ملف من كمبيوتر لكمبيوتر تانى هاتعمل ايه ؟ هاتنسخه على سى دى CD أو هاتوصل الهارد ديسك ببعض أو بفلاشه Flash Diskو دا طبعا مش متاح لأنك مش فى بيتكم دا أنت فى شركه محترمه و أكيد فى ضمانات على الاجهزه و بالتالى إن ربطهم بشبكه واحده حاجه بتوفر الوقت و المجهود و المال و قد تكون بين جهازين أو أكثر .


2- الشبكه الواسعه النطاق (WAN) (Wide Area Network)



ودى المقصود بيها الشبكه التى تربط بجهازين أو أكثر بمناطق أكثر اتساعا, يعنى شبكه أمكانيتها أكبر من الشبكه المحليه و دى ممكن تكون بين شركه ليها أكتر من فرع فى أكتر من مدينه واحده, ممكن توصلهم ببعض عن طريق الشبكه الواسعه النطاق.

-إيه هو (workgroup computing) أو مجموعه العمل للأجهزه ؟
معناها إن مجموعه من المستخدمين للكمبيوتر ممكن إنهم يشاركوا مصادر معلوماتهم سوا , لو إنت فى جرووب وحاطط Options ( أختيارت ) معينه لصفحه الطبع للطابعه (Printer) بتبقى للجروب كله يعنى لو أى جهاز من الاجهزه دى حب يطبع أى ورقه هاتطبع تقائيا بالاختيارات اللى إنت محددها للجروب.


- من مميزات مجموعات العمل للكمبيوتر تقريبا تقدر تحط كل مميزات الشبكات :
1-توفير الوقت. 2- توفير المجهود. 3- توفير الاموال . 4-العمل المنظم.

هناك بعض التعاريف هايبقى احسن لو اخدنا عنها فكره علشان ما نبقاش زى الطرش فى الزفه:










-التلكس Telex :
قول للزمان إرجع يا زمان ( الله عليك ) أنا عن نفسى كنت أسمع عنه فى فتره بس ما افتكرش انى اتعاملت مع التلكس وجها لوجه, و دا بقى يا بوب بيقولك كان ياما كان كان اخترعوه لإرسال الرسائل عن طريق بكاه التلكس و تقدر تقول إنه إنقرض دلوقتى لأن فى إيميل إلكترونى و فاكس .


- الفاكس Fax:
الفاكس جهاز يجعلك قادر على إرسال رساله مطبوعه او اى مادى مطبوعه على ورق من خلال الإتصال بخط التليفون و من ثم يقوم جهاز الفاكس المستقبل لهذه البيانات لتحويلها من إشارات إلى ماده مطبوعه على ورق , يعنى كأنك بتصور ورقه عند بتاع التصوير هو بيعمل ايه ؟ بيحط الورقه و بتتمسح ضوئيا و بتتعاد طبعها, هو بقى دا نفس الكلام بس بعد ما يمسحها ضوئيا بيبعت البيانات بتاعتها او الشكل بتاعها كإشارات للفامس المستقبل اللى بيحول الاشارات لطباعه. و الاجهزه دلوقتى بتاعه الكمبيوتر تقدر تجيب ليها كارت فاكس و تقدر تشغله إنك تستقبل و تبعت فاكس و على فكره لما بتتصل بالنت و بتسمع الاصوات الغريبه دى بتبقى نفس الاصوات اللى هاتسمعها لما تيجى تبعت فاكس.


- المودم Modem :
ودا اللى متاخد من كلمه MODulate والمودم وظيفته إنه يرسل البيانات عبر خطوط التليفون لجهاز تانى و اللى يستقبلها عن طريق المودم الخاص به أى ارسال و استقبال الاشارات و التى يترجمها المودم إلى بيانات .

- (ISDN ) - (Integrated Service Digital Network) :
أى إس دى إن و معناها الشبكه الرقميه للخدمات المتكامله ودى بتسمح بتبادل البيانات أسرع من أجهزه المودم العاديه و بتبقى من 64 إلى 128 kb كيلو بت فى الثانيه.


-الأقمار الصناعية Satellites:
يعنى التقدم كله بمعنى انك تبقى على النت و بتتصل بأى دوله و بتدخل على النت من اى دوله, يعنى التقدم, يعنى التكنولوجيا .


البريد الإلكترونى (E-mail) :



إذا كان لديك كمبيوتر + وسيله إتصال على الانترنت من مكونات الكمبيوتر + إنترنت, يمكنك أن ترسل بريد إلكترونى إلى أى شخص بأى دوله, سواء إن كان على إتصال أم لا

ومن فوائد البريد الإلكترونى (E-mail) هو سرعته العاليه, توفير المجهود, لا يحتاج إلى خبره, إمكانيه الإرسال لأكثر من شخص فى المره والواحده

هناك نوعان من الايميلات, الايميلات أو الرسائل الداخليه و الايميلات و الرسائل التى تكون على المستوى العالمى بمعنى :

إنك فى شركتك لو عندك شبكه زى اللى إتكلمنا عنها فوق تقدر بسهوله إنك تعمل نظام رسائل خاص بالشركه ومفيش حد يقدر يستعمله من برا الشركه.

أما النظام التانى وهو انك تدخل على النت و تبعت ايميل لأى حد على النت و تقدر تستقبل ايميل برده من اى مكان فى العالم .
من عيوب الايميل ما يسمى بال (Spam) وهى ما يصلك عن طريق الايميل من إعلانات و كثرتها تضايق المستخدم لأنها تكون خادعه على قدر الإمكان وهى تكون عادة عن موقع معين قد يكت لك انك ربحت معهم او سيصلك أشياء إن اشتركت و عندما تشترك تجد انك خدعت و ذهب وقتك هباء لأن مثل هذه الشركات ترسل لك إعلانات بعد ذلك تستفيد هى منها و تنزعج انت.

الأنترنت Internet :




الانترنت شبكه على مستوى العالم تتيح لأى شخص الاتصال بها من اى دوله فى العالم و تتيح له الوصل لمعلومات و بيانات هائله و متخصصه فى أى مجال وسرعه كبيرهوالتى تعتبر ميزه كبيره.

وهذه المميزات جعلت الانترنت فى الصداره كشبكه تخدم كل المستخدمين :

الباحثين و مجالات الافاده فى ابحاثهم فبدلا من البحث فى مجلدات يمكنه ان يبحث بواستطه كلمه فى محرك بحث.

الشركات التى تعرض منتجاتها على الانترنت و تقوم بالتسويق له و بيعه.

المستخدم العادى و الذى أصبح يمكنه أن يشترى احتياجاته كلها من على الانترنت .

طب انا دلوقتى عايز ادور عن اى حاجه وعلى فكره تأكد إن أى حاجه هاتلاقيها على النت , المهم أنا دلوقتى عايز اعمل بحث عن حاجه معينه اعمل ايه ؟

فى اكتر من موقع بأكتر من أسم طب اعمل ايه ؟

دى فايده محركات البحث اللى موجوده على الانترنت و اللى فيها بتتحط المواقع و تتحفظ بطريقه تقدر تدور بعد كده فى الموقع دا عن كلمه يوريلك المواقع الموجوده اللى اتذكر فيها الكلام دا

أمثله على محركات البحث العالمية :

جوجل:


http://www.yahoo.com/

ألتافيزتا:





وهذه بعض المحركات الاخرى :



http://www.go.com/



http://www.excite.com/


ودى تعتبر من أهم و أشهر محركات البحث .

أما عن مكتشف الانترنت (Interner Explorer) فدا حاجه زى الويندوز و تقدر من خلاله تصفح الانترنت وهاتلاقى درس موجود على المدونه على استخدام Internet Explorer المتصفح .

دى كانت نبذه صغيره على النت لحد ما هاناخد ماده لوحدها عن النت فى الاخر.

الحمايه وحقوق الطبع لأستخدام الانترنت :

فى ناس متسللين و اللى بيحبوا يتلصصوا او يدمروا اجهزه اخرى و اللى بيطلق عليهم ( هاكرز ) (Hackers) ودول فى منهم مجموعات بتبتذ ناس من خلال الحصول على معلوماتهم الشخصيه و ملفات مهمه من أجهزتهم أو تدمير شركات من خلال الحصول على معلومات عن نظامها و اختراق شبكاتها و تدمير البيانات,دا اللى يخلينا لازم ناخد بالنا كويس ووضع جهاز امنى عالى على الاجهزه فى حاله وجود ملفات مهمه او بيانات سريه و توصيلها بالانترنت. غير كده ولا كده فى الفيروسات اللى النت مليان بيها يعنى ممكن موقع تدخله وميكنش عندك أنتى فيرس كويس يحملك فيرس و بالشفا يا ريس, ( فى على المدونه درس عن الانتى فيرس و اذاى تتأكد من سلامه جهازك من غير انتى فيرس على النت ), وقد تتم سرقه كلمات المرور الخاصه بالايميلات أو كلمه المرور الخاصه بالفيزا كارد Visa Card و هو ما يعتبر عمل إجرامى بالطبع .

طب نعرف حاجه مهمه إيه هى الفيروسات دى ؟ عامله اذاى يعنى ؟ شكلها ايه ؟

الفيروسات دى عباره عن برامج صغيره يعنى أوامر محطوطه بنظام فى ملف و لما بيوصل جهازك و يشتغل بيبدأ ينتشر حسب نوعه يعنى فى فيروسات مصممه لإحداث فوضى فى الجهاز و تانيه بتخلى الجهاز مليان بملفات ملهاش لزمه و تانيه بتعطل اهم الوظائف فى الويندوز المهم انه هايخنقك و من اعراض الفيرس مثلا ( بطىء الجهاز- مسح ملفات معينه - ظهور ملفات غريبه )و الفيروسات بتقوم بنسخ نفسها تلقائيا على الجهاز و غالبا مش هاتلاقى فيروسات الا على الملفات اللى امتدادها EXE. لأنها بتلحق نفسها بالملفات اللى بتشغل البرامج علشان كل مره تشغل فيها البرنامج بيشتغل فيها الفيروس بنسخ نفسه او تنفيذ بعض الاوامر علشان كده لما بتاخد ملفات من واحد صاحبك او تنزله من النت و تشغله لو فيه فيرس مش هاتلاحظ الا بعد مرور فتره و ممكن تضطر لأنك تمسح ملفات و برامج كتير الفيروس ضربها وهنا بتيجى اهميه النسخه الاحتياطيه Backup .

طب احمى نفسى اذاى ؟

أولا : تلاقى انتى فيرس قوى و معروف و ماتجربش انتى فيرس جديد لأنك مش محتاج تقعد تجرب كل شويه برنامج شكل ممكن يكون خفيف و سريع بس ملوش لزمه , انتى تنقى انتى فيرس و تعمله update لأن كل فتره بتبان فيروسات جديده و بينزلولها حلول ودى برده سهله انك تتأكد من فاعليه الانتى فيرس بتاعك من الدرس الموجود على المدونه

ثانيا : ما تفتح ايميلات من النت بمرفقات انت مش عارفها حتى لو من عنوان واحد صاحبك لأن فى احيانا فيروسات بتبعت نفسها لوحدها مجرد انك فتحت الايميل بتبعت نفسها من ايميلك لكل العناوين اللى عندك.

ثالثا : لو فتحت ايميل و فيه مرفقات و شاكك فيه, ما تفتحهوش علطول احفظه على الجهاز و بعد ما تعمله سكان بالانتى فيرس Antivirus وتتأكد من سلامته تقدر تفتحه .

رابعا : لما تنزل اى برنامج نزله من موقع موثوق فيه علشان ما تتبعتش لأن حتى برنامج الانتى فيرس اللى هاتنزله ممكن يكون مضروب بفيروس يعنى لازم تتأكد الاول من الموقع .

خامسا : النسخه الاحتياطيه للبيانات و المعلومات المهمه على جهازك .

التأمين و النسخ الاحتياطى :



انت دلوقتى شغال على الكمبيوتر وعمال بتكتب عليه ابحاث او بتحط فيه معلومات و بيانات بقالك فتره عمال بتجمع فيها من الانترنت شويه من صحابك شويه و بتشترى شويه, لو لقدر الله الكمبيوتر باظ أو الهارد ديسك Hard Disk اتحرق هاتعمل ايه ؟ أكيد هاتكسر الكمبيوتر من الغيظ .

طب فى حاجه أسهل من كل دا أنت ممكن تعمل Backup يعنى نسخه أحتياطى ودى على الاقل مش هاتعيد كتابتها او هاتجمعها تانى لأ دا دى انت بس هاتعمل نسخ للبينات اللى عندك و تريح دماغك و تقوم بعض الشركات بعمل هذه النسخ الاحتياطيه Backups ووضعها على أقراص مرنه و الاحتفاظ بها بمكان أخر و قد يحدث أن تقوم بعض الشركات الكبيره بأستخدام الانترنت لوضع معلوماتها عليه

وهناك نظامان لعمليه النسخ الاحتياطيه للبيانات التى توضع على جهاز الكمبيوتر :

1- النسخ الاحتياطى الكامل :
ودا بتاخد اللى على الهارد ديسك كده هيله بيله كله عامل على باطل و بتتنسخه .

2-النسخ الاحتياطى التزايدى :
دا للناس المنظمه أو الشركات المحترمه بمعنى أنك بتقوم بعمل نسخ احتياطيه كل فتره زمنيه معينه أسبوع مثلا و عمل نسخ احتياطيه كل يوم للملفات حديثه الانشاء و الاضافه للنسخ الاحتياطيه بنظام . و هناك اكثر من برنامج يمكنك من عمل هذه النسخ الاحتياطيه و كل ما عليك هو ان تختار اى النظامين تريد و تسيب الباقى عليه.

- حقوق النسخ Copyrights :

فى حقوق نسخ للبرامج بمعنى أن الدنيا مش حلوه أوى كده لأ دا فى حاجه اسمها حقوق نسخ و تحت القانون يعنى مثلا أنك ما تقدرش تنسخ او تبيع او تنسخ أى عمل ليه حقوق نسخ الا اما تاخد إذن مسبق من صاحب حقوق النسخ, بس دا طبعا ما بيحصلش . لأن ببساطه أى حاجه بتاخدها من النت برامج مثلا بتكون بفلوس وانت بتنزلها من منتدى او اى موقع مع الباسوورد بتاعتها دا ضد حقوق النسخ و اللى مشهور فى مصر انهم بيقفلوا الانترنت كافيه تبع المصنفات علشانه لأن ببساطه معندهومش نسخه ويندوز أصليه و اى برنامج على الجهاز نفس الحكايه المهم يعنى انا بس حبيت اوضح ايه هو حقوق النسخ

أهمها أنواع تراخيص البرامج :

1-برامج مجانيه ( Freeware ) ودى مجانيه بس ممنوع تدخلها تبع برنامج تانى او تعمل على تطويرها ,

2-برامج تجريبيه (Shareware) ودى بقى يا برنس جر رجل بمعنى ان الشركه تخليك تشغل البرنامج او تنزله من النت عادى جدا لكن لفتره معينه لحد 15 يوم مثلا او شهر او اى فتره زمنيه معينه و بعد كدهع بيقفل و ما ينفعش تشغله الا لما تشتريه و فى برامج بتنزل من غير فتره معينه بس شايلين منها خصائص مهمه و يقولك اشترك و احنا نفعلهالك .

وقانونا لو نزلت اى برنامج من النت لازم تشوف ترخيصه ايه بالظبط .






*-.::.-* الحمد لله تمت ماده تقنيه المعلومات *-.::.-*
حمل مادة تقنية المعلومات
[ اقرأ المزيد ...]

by TemplatesForYou-TFY
SoSuechtig