إذاى أعمل بريد إلكترونى ؟

إذاى أعمل بريد إلكترونى ؟

أهلا بيكم فى الدرس التانى وهو إذاى اعمل ايميل -بريد الكترونى- خدمه البريد الالكترونى بتقدمها مواقع كتير كخدمه لزوارها واللى طبعا بتقوى الموقع لأنه بيضمن زوار كتير للموقع ومن أشهر المواقع اللى بتقدم خدمه البريد الالكترونى Hotmail ,Yahoo, Google ..


واللى خلاهم من اشهر المواقع أن لكل موقع برنامج دردشه من خلاله تقدر تضيف أصحابك اى تتعرف على ناس من خلالهم وأى موقع منهم أو غيرهم بيطلب نفس المعلومات تقريبا وهانشوف سوا بالصور ايه اللى بيتطلب مننا علشان نعمل ايميل على اى واحد منهم...
نبتدى بال Yahoo :
1-بندخل على الموقع بتاع الياهوو : http://www.yahoo.com
2- بنختار Mail
3-بعد كده هاننتقل الى الصفحه دى و هانختار منها
Sign Up
ومنها هانبتقى ملئ البيانات المطلوبه.
زى ما احنا شايفين قدامنا دلوقتى فى الصوره القائمه اللى هانكتبها و البيانات كالتالى:
1.Tell us about yourself…
هنا بنحط الاسم الثنائى My Name
هنا بنختار لو ولد ولا بنت ولد ولابنت Gender
ولد М
بنت F
تاريخ الميلاد الشهر و اليوم و السنه Birthday
بلد الاقامه I live in
الكود البريدى و دا بيختلف حسب البلد Postel code
2-Yahoo an ID and password
Yahoo! ID and Email هنا أسم الايميل اللى عايز تخليه ليك يعنى لو مثلا عايزين نعمل ايميل اسمه زعبوله هايبقى نكتب زعبوله بس كده
Password ودى كلمه السر اللى هاتبان على انها ** وهانحط باسوورد ما ننساهاش و فى نفس الوقت ما تبقاش سهله و الخانه اللى على اليمين هاتأكدلك اذا كانت سهله ولا صعبه وققل حاجه 6 حروف وطبعا الافضل انك تنوع بين ارقام و حروف علشان تبقى اقوى.
Re-type Password هنا بتعيد كتابه الباسوورد تانى علشان بتأكد انك قاصدها ومش غلطان فى اى حرف
3-In case you forget your ID or password…
Alternate Email
هنا لو عندك ايميل تانى تحطه بس ممكن تسيبها فاضيه مفيش مشاكل
Security Question
هنا لو نسيت كلمه السر بتاعتك و حبيت تستعيدها بيسألك السؤال اللى هاتختاره هنا
Your Answer
الاجابه اللى هاتجاوبها على Security Question
Just a couple more details …
Type the code shown
المربع اللى فى الخانه اللى تحت فيه حروف و ارقام هانكتبها فى المربع دا .
Do you agree?
هنا بيقولك انت موافق على اتفاقيه الياهوو هانعلم على الخانه الفاضيه .
و هاندوس على Creat My Account
مبروك يا معلم بقى عندك ايميل بالأسم اللى انت اخترته واللى بان باللون الاصفر و تحتيه بيقولك معلوماتك اللى متسجله عند الياهوو دلوقتى هاندوس على Continue .
كده انت على الايميل عندك
وشرح الميل و مكوناته هايبقى درس تانى المهم دلوقتى اننا نعمل ايميل
وعموما البريد اللى بيجيلك بتدوس على inbox علشان تشوفه زى المكان اللى فى الصوره دى.
*دا كان شرح اذاى نعمل ايميل على الياهوو.
الهوت ميل مش هايختلف كتير برده بندخل على الموقع الاساسى http://www.hotmail.com/
وبندوس على Sign up وهانلاقيه طالب نفس المعلومات تقريبا زى الياهوو و ان كانت ققل شويه
نيجى لل Gmail أظن حفظنا خلاص www.gmail.com
Sign up و ندب المعلومات بتاعتنا ...


*طيب انا ليه اعمل ايميل على الموقع دا ولا دا ولا دا ؟
لأن فى برامج زى ما قولنا مش هاينفع اسجل فيها الا اذا كان عندى ايميل على الموقع الخاص بيها وليه لأ ؟ أى ايميل خدمه مجانيه على المواقع دى يعنى مش هاياخد أكتر من 3 او 4 دقايق من وقتك . وياريت لو نتدرب دلوقتى على الدرس علشان ما ننساهوش ..

دا درس اذاى أعمل ايميل يا ريت لو حد عنده استفسار يبعتهولى كتعليق علشان كله يستفاد ,وعلى فكره انا عارف ان فى ناس كتير بتعرف اذاى تعمل ايميل بس برده فى ناس ما تعرفش اذاى تعمله .
احنا هنا بنتعلم من الاول خالص و الاساسيات اللى ان شاء الله هانميها سوا لأنى كذا مره اشوف اكتر من واحد بيطلب من حد انه يعمله ايميل و انا هاحاول على قدر الامكان انى اكتب دروس كتير تعليميه هنا أكتر .
وشكرا لوقتكم ...
[ اقرأ المزيد ...]

ايه هو الانترنت ؟

ايه هو الانترنت؟؟

أنا مش هاقعد ققولكم حاجات مش هاتفرق كتير مع المستخدم العادى زى السيرفر او البروتوكولات و الكلام المجعلظ دا
الانترنت عباره عن شبكة معلومات مدعمه بالصوت و الصوت.
يعنى الانترنت و اللى ممكن نختصره بكلمه النت اللى معناها الشبكه زى صندوق العجايب هتلاقى فيه اى حاجه تقدر تلاقى فيه مثلا موقع للأغانى او للأفلام أو للطب او لأبحاث الفضاء أو ......... إلخ إلخ إلخ.


وعلشان ندخل على النت هانحتاج وسيله اتصال -سواء Dial up أو DSL - والصفحه زى اللى انت بتقرا فيها الموضوع دا دلوقتى, الديال أب Dialup دا عباره عن الاتصال من التليفون برقم شركه معينه و هى بتحولك على النت و الدى أس أل DSL عباره عن وصله برده من شركه معينه بتوصلك بالنت بس الفرق ان مالهاش علاقه بالتليفون يعنى الديال أب بتدخل عن طريق التليفون الدى أس أل وصله من شركه وبتبقى 24ساعه و سرعه أكبر بكتير من الديال أب يعنى مثلا الديال أب لو هاتنزل اى حاجه من النت هاتنزل بسرعه 4 أو 3 كيلو بايت فى الثانيه اما الدى اس ال فققل سرعه بتوصل ل 25 كيلو فى الثانيه أظن وضح الفرق.

*بنسمع كتير عن دى اس ال سرعته 256 أو 500 أو 1 ميجا او 2 ميجا ايه الفرق؟
زى ما قلت ان دى سرعه الدى اس ال يعنى مثلا:
*دى اس ال سرعته 256 كيلو معناها: ان انت هاتنزل من النت اى حاجه بسرعه 25 كيلو فى الثانيه بس طبعا أحيانا مقاومه السلك او الشركه اللى بتزودك بالخدمه بيبقى عليها ضغط فممكن تلافى السرعه 23 او20 او حتى 18 فى بعض الاحيان. و كذلك على كل السرعات
*دى اس ال سرعته 500 كيلو معناها: ان انت هاتنزل من النت اى حاجه بسرعه 50 كيلو فى الثانيه.
*دى اس ال سرعته 1 ميجا معناها: ان انت هاتنزل من النت اى حاجه بسرعه 100 كيلو فى الثانيه.
*دى اس ال سرعته 2 ميجا معناها: ان انت هاتنزل من النت اى حاجه بسرعه 200 كيلو فى الثانيه.
وطبعا اسعار الخدمه بتزيد مع زياده السرعه.
طيب عرفنا دلوفتى الفرق بين الDialup , DSL و عرفنا أن علشان ندخل على النت بنقوم بالأتصال و بنفتح صفحه نت او زى ما فى ناس بتسميه متصفح.
-كده احنا على النت ايه بقى؟ ها ؟ عانعمل ايه ياعم الحج؟

فى الصفحه اللى قدامك دلوقتى فى 3 قوائم افقيه:
أول قائمه:
ودى مش هانتعمق اوى فى شرحها هانعرف اهم واحده فيهم بس وهى ال Favorites هاتلا قيها رابع واحده من الشمال فوق و معناها المفضله يعنى لو عجبتك صفحه على النت و مش عايز تقعد تدور عليها كل مره بتدخل على النت تحطها فى المفضله زى ما موضح فى الصور..بندوس على Favorite ونختار أول أختيار و هاتجيلك رساله بتقول انت عايز تحفظ الموقع بالأسم دا هاندوس ok .


والمره الجايه بتدوس على المفضله هاتلاقى الصفحه نزلت فيها جرب دلوقتى و شوف النتيجه.



2-لقائمه التانيه و هى اهم واحده :

Back ودا معناه الرجوع للصفحه اللى فاتت
Front ودا معناه التقدم للصفحه للأمام يعنى لو عملت back هاترجع للصفحه اللى فاتت طب لو حبيت ترجع للى كنت فيها ؟ تدوس على Front
Stop ودا من أسمه معناه قف لو فتحت موقع و لسه بيحمل و مش عايزه يكمل تقدر تدوس على stop
Refresh ودا لو موقع وقف مثلا او موقع مفتحش تدوس على الزرار دا علشان تنعشه :)
Home ودا بيخليك تروح على الصفحه اللى النت بيفتح عليها كل مره .
و دول أهم ما فى القايمه التانيه.








شريط العنون او: Address bar
ودا اللى بتحط فيه عنوان اى موقع اللى فى الصوره باللون الاحمر و بيبقى غالبا تحت القائمه التانيه.







طبعا فى حاجات كتير كان ممكن تتشرح بس هنا احنا بناخد القشور .




اى حد يديلك موقع معين دلوقتى انت عرفت انك هاتاخد العنوان و تحطه فى ال Address bar




ولو مفيش وجود للموقع دا هايجيبلك صفحه بيضاء مكتوب عليها page cannot be displayеd
زى ما فى الصوره كده و دى حلها اننا ندور على اسم الموقع فى اى محرك بحث و اللى هانشرحه فى موضوع لوحده .


دا أول درس هنا و عرفنا منه ايه هو النت و اذاى ادخل على موقع وايه هى مكونات الصفحه الرئيسيه ..
[ اقرأ المزيد ...]

لأى أستفسار يرجى المراسله على الايميل التالى


لأى إستفسار يمكنك إضافتى على برنامج الياهوو أو مراسلتى على الإيميل التالى:

وبالطبع أرحب بأى إقتراح للمدونه, ويمكنك إرساله بالإيميل وشكرا.
[ اقرأ المزيد ...]

.."::...أهلا بكل من اراد التعلم بيننا...::"..

اهلا بيكم فى مدونه أنا عربى




هنا هانعرف سوا واحده واحده اهم اساسيات النت و على فكره مش صعبه خالص أنا هنا هاشرح بالصور و خطوه خطوه وان شاء الله أى حد هايحتاج حاجه معينه يقدر يبعتلى على الايميل و انا اشرحاله هنا علشان الكل يستفاد....

*أكتر الاسئله الشائعه و اللى هانحاول نجاوب عليها سوا هنا ومنها :


1-ايه هو النت دا ؟
2-اذاى اعمل ايميل ؟
3-اذاى ادخل على الايميل ؟
4-اذاى أشترك فى اى موقع ؟
5- اذاى اعمل مدونه ؟
6- اذاى اعمل موقع ؟
7-اذاى ققدر اشترك فى skybee?
8- اذاى اشترك فى ال ICQ ?
9- اذاى ادخل على الياهوو ما سنجر؟
10- اذاى ادخل على الmsn ?
11- اذاى اشترك فى المنتديات ؟
[ اقرأ المزيد ...]

by TemplatesForYou-TFY
SoSuechtig